અખેગીતા/કડવું ૩ જું - વેદાંતના પ્રાચીન શ્રોતાવક્તાનાં નામ
| ← કડવું ૨ જું - વેદાંતી કવિઓની સ્તુતિ | અખેગીતા કડવું ૩ જું - વેદાંતના પ્રાચીન શ્રોતાવક્તાનાં નામ અખો |
કડવું ૪ થું - અજ્ઞાની જીવની દુઃખ દશા → |
કડવું ૩ જું - વેદાંતના પ્રાચીન શ્રોતાવક્તાનાં નામ
રાગ ધન્યાશ્રી
અણછતો આત્મા તેશું ઓચરેજી, આપનું વર્ણન તે આપે કરેજી;
જીવતણું પદ જોતાં જે નીસરેજી, સાંખ્યયોગજોતાંજેહરિઉગરેજી
પૂર્વછાયા
ઉગરે[૧] જે વિચાર કરતાં, બ્રહ્માદિક જે ગૃહી રહ્યા;
તે હરિને તમે ઓળખો, જે આદ્યપુરૂષે[૨] અજને[૩] કહ્યા. ૧
જે પદ શિવના તનપ્રત્યે[૪], દત્તે[૫] કહ્યું વિશદ[૬] કરી;
આકાશતવકેરી[૭] કથા, [૮]ષડાનને ઉરમાં ધરી. ૨
વિધિ વશિષ્ટેં કહી કથા, રઘુનંદન-આગળ[૯] જેહ;
અર્ણવ[૧૦] બ્રહ્મ-વિદ્યાતણો, ભાઇ દેખાડ્યો છે તેહ. ૩
અનંત પ્રકારે અચ્યુતે[૧૧], કહ્યું ભારતને[૧૨] જ્ઞાન;
ગીતા ગાઈ ગોવિંદે, કર્મ-યોગ [૧૩] નિદાન. ૪
સમઝાવ્યા સાનેં કરી, જનકેં જે શુકદેવને;
મહામુક્ત થઇને પરવર્યા, જ્યારે પ્રીચ્યો અંતર ભેવને[૧૪]. ૫
ભીષ્મે ભગવાન-સાન્નિધ્ય, પાંડવપ્રત્યેં જે કહ્યું;
શાંતિપર્વે શાતા દીધી, હત્યાનું હારદ[૧૫] ગયું. ૬
વેદવ્યાસે વેદ વેંહેંચ્યા, કર્મ ધર્મ પોષ્યા જીવને;
તેની દાઝેં લાગ્યા દાઝવા જો જાણ્યા નહિ નિજ શિવને[૧૬]. ૭
પછી નારદેં નારાયણકેરૂં, નિજ જ્ઞાન કહ્યું મહાદ્વિજને[૧૭];
ત્યારે દ્વૈપાયનની[૧૮] દાઝ ભાગી, જ્યારે કૃપા કીધી સંતજને. ૮
શિવેં કહ્યું શિવાપ્રત્યેં[૧૯], નિરાલંબ[૨૦] નિજધામ[૨૧]
અમર કીધો આત્મા, અદ્યાપિ[૨૨] સહસ્ત્ર[૨૩] નામ. ૯
કહે અખો વસ્તુજ્ઞાનવિના[૨૪], કુશળ ન હોય જંતને[૨૫];
નિજધામ હીંડો જાણવા, તો સેવો હરિ-ગુરુ-સંતને. ૧૦
- ↑ અવશેષ રહે
- ↑ નારાયણ
- ↑ બ્રહ્માને
- ↑ પુત્રપ્રતિ-કાર્તિકસ્વામીપ્રતિ.
- ↑ દત્તત્રેયે
- ↑ સ્પષ્ટ
- ↑ આકાશ જેવાની-બ્રહ્મની.
- ↑ કાર્તિકસ્વામીએ
- ↑ રામચંદ્રજીની સમીપ
- ↑ સમુદ્ર
- ↑ શ્રીકૃષ્ણે
- ↑ અર્જુનને
- ↑ નિષ્કામકર્મયોગ
- ↑ આત્મ સ્વરૂપને, અંતરના રહસ્યને.
- ↑ શંકા
- ↑ બ્રહ્મસ્વરૂપને
- ↑ વ્યાસજીને
- ↑ વ્યાસજીની
- ↑ પાર્વતીપ્રીતિ
- ↑ આલંબનરહિત
- ↑ સ્વયંપ્રકાસહ સ્વરૂપ
- ↑ હજી પણ
- ↑ હજાર
- ↑ આત્મસ્વરૂપના જ્ઞાન વિના.
- ↑ પ્રાણીને