આ તે શી માથાફોડ !/૭. પાપ લાગે
| ← ૬. પણ મારી બા ને કહે ને ! | આ તે શી માથાફોડ ! ૭. પાપ લાગે ગિજુભાઈ બધેકા |
૮. પણ...? → |
પાપ લાગે
હજામ અને બબલી વચ્ચે ચાલતી વાતચીત તરફ મારું ધ્યાન એકાએક ગયું. હજામ કહે : “ખોટું બોલીએ તો પાપ લાગે.”
બબલી કહે : “ભલે પાપ લાગે, હું તો ખોટું બોલીશ.”
હજામ કહે : “ન બોલાય; પાપ લાગે.”
બબલી કહે : “એમાં શું થઈ ગયું ? હું તો બોલીશ. ખોટું બોલાય.”
હજામ કહે : “ભાઈ ન બોલાય. ખોટું બોલીએ તો પાપ લાગે.”
બબલી કહે : “ગિજુભાઈ ! ખોટું બોલીએ તો પાપ લાગે ?”
મને કશો ઉત્તર દેવાનું મન ન થયું. હું બોલ્યો નહિ.
બબલીએ હજામને પૂછ્યું : “ખોટું બોલીએ તો મરી જઈએ ?”
હજામ કહે : “ખોટું બોલીએ તો પાપ લાગે.”
બબલી મારા તરફ જોઈને કહે : “ખોટું બોલીએ તો મરી જઈએ ?”
મેં ઉત્તર ન આપ્યો.
બબલી કહે : “પાપ કેવી રીતે લાગે ?”
હજામ કહે : “પાપ લાગે; ખોટું ન બોલાય.”
બબલી કહે : “ત્યારે તો હવે એક વાર પાપ લગાડવું પડશે.”
×××
આપણે હજામને ધાર્મિક શિક્ષણ આપતાં રોકવો ન જોઈએ ?
×××
બબલી કહે : "એક વાર ખોટું બોલીશ એટલે પાપ લાગશે.”