કલ્યાણિકા/સર્વગોચર
| ← મારે દ્વારે | કલ્યાણિકા સર્વગોચર અરદેશર ખબરદાર |
આત્માનંદ → |
સર્વગોચર
• પદ[૨] •
નાથ ! જ્યાં જ્યાં હું જોઉં ત્યાં તું જ રે !
તું જ ખીલી રહ્યો વિશ્વકુંજ રે :
નાથ ! બીજે ક્યાં જઈ તને શોધવો એ જી ? - (ધ્રુવ)
કનકે રેલ્યાં દ્વારથી રે
દીસે સૂર્યભર્યો તુજ હાથ ;
જ્યોતિફુવારા ફોરતો
સૌને તેમાં ઝગાવે સાથ રે :
નાથ ! બીજે ક્યાં જઈ તને શોધવો એ જી ? ૧
સંધ્યા ઉષાના કેશમાં રે
તારી અંગુલિઓ કરે ગેલ ;
પળપળ નવનવ રંગમાં
તેમાં રેલે હૃદયરસ રેલ રે !
નાથ ! બીજે ક્યાં જઈ તને શોધવો એ જી ? ૨
કાળી અંધારી રાતમાં રે
તારી દિવ્ય ચરણરજ સોહ્ય ;
અનંતતાના પંથમાં
તારકપગલી પડી સહુ જોય રે !
નાથ ! બીજે ક્યાં જઈ તને શોધવો એ જી ? ૩
સાગર કેરી ઊર્મિમાં રે
તારા ઊછળે સનાતન સૂર ;
તેમાં અબોલ ઊંડો વહે
પેલો નાદ તારો ભરપૂર રે !
નાથ ! બીજે ક્યાં જઈ તને શોધવો એ જી ? ૪
ફૂલે ફૂલે નૂર ઝૂલતું રે
તારો શ્વાસ સુગંધિત વાય ;
થળથળ લીલા લસી રહી
તારું હૃદય બહેકાવે માંહ્ય રે !
નાથ ! બીજે ક્યાં જઈ તને શોધવો એ જી ? ૫
પ્રાણી પ્રાણીના પ્રાણમાં રે
ઝળે તારું જ ચેતન એક ;
ઠોકી રહ્યો ઉરબારણાં :
તારો ગજવું અદ્દલ અહાલેક રે !
નાથ ! બીજે ક્યાં જઈ તને શોધવો એ જી ?