ગાફલ બેગરજુ
| ગાફલ બેગરજુ દેવાનંદ સ્વામી |
પદ ૮ રાગ એજ.
ગાફલ બેગરજુ, આ તન એળે ગમાયો;
ધર્મ વિસારી ધંધે વળગ્યો, કૂડે ધૂડ્ય કમાયો રે... ગાફલ° ૧
કામનિયુંમાં ફરતો ડોલે, વિષય ભરેલી વાતું;
પાપ કરીને પૂરું બાંધ્યું, ભવસાગરનું ભાતું રે... ગાફલ° ૨
દેવમંદિરમાં દર્શન કરવા, ભૂલ્યો ભટક્યો આવે;
માનનિયુંનાં મુખ જોવાને, આંખડિયું અટકાવે રે... ગાફલ° ૩
આરત્ય રાખી ના ઉચ્ચારે, રામકૃષ્ણ મુખ વાણી;
ગ્રામ્યકથામાં દીએ ગપોડા, જૂઠે જૂઠું જાણી રે... ગાફલ° ૪
ગાંજો ભાંગ્ય લીલાગર મફર, હોકો પીવે ચાવે;
દેવાનંદ કહે દેખ વિચારી, દુઃખનો અંત ન આવે રે... ગાફલ° ૫