નંદલાલ નહિ રે આવું
| નંદલાલ નહિ રે આવું મીરાંબાઈ |
૧૧
.
નંદલાલ નહિ રે આવું કે ઘેર કામ છે;
તુલસીની માળામાં શ્યામ છે; વા’લા. નંદલાલ૦
વૃંદા તે વનને મારગ જાતાં;
રાધા ગોરીને કાન શ્યામ છે, વા’લા. નંદલાલ૦
વૃંદા તે વનમાં રાસ રચ્યો છે;
સહસ્ત્ર ગોપી ને એક કહાન છે રે; વા’લા. નંદલાલ૦
વૃંદા તે વનને મારગ જાતાં,
દાણ આપ્યાની ઘણી હામ છે; વા’લા. નંદલાલ૦
વૃંદા તે વનની કુંજગલીમાં;
ઘેરઘેર ગોપીઓનાં ઠામ છે રે; વા’લા. નંદલાલ૦
આણી તીરે ગંગા વા’લા પેલી તીરે જમુના;
વચમાં ગોકુળિયું ગામ છે; વા’લા. નંદલાલ૦
ગામના વલોણાં મારે મહીનાં વલોણાં,
મહીડાં ઘૂમ્યાની ઘણી હામ છે; વા’લા. નંદલાલ૦
બાઈ મીરાં કે પ્રભુ ગિરધરનાં ગુણ;
ચરણનમેં સુખ શ્યામ છે; વા’લા. નંદલાલ૦
અન્ય સંસ્કરણ ફેરફાર કરો
નંદલાલ નહિ રે આવું કે ઘેર કામ છે;
કામ છે, કામ છે, કામ છે રે;
નંદલાલ નહિ રે આવું કે ઘેર કામ છે.
આણી તીરે ગંગા ને પેલી તીરે જમુના;
વચ્ચમાં ગોકુળિયું ગામ છે રે;
નંદલાલ નહિ રે આવું કે ઘેર કામ છે.
વનરા રે વનમાં રાસ રચ્યો છે;
સો-સો ગોપીઓની વચ્ચે એક કહાન છે રે;
નંદલાલ નહિ રે આવું કે ઘેર કામ છે.
વનરા તે વનની કુંજગલીમાં;
ઘેરઘેર ગોપીઓના ઠામ છે રે;
નંદલાલ નહિ રે આવું કે ઘેર કામ છે.
વનરા તે વનના મારગે જાતાં;
દાણ આપવાની મુને ઘણી હામ છે રે;
નંદલાલ નહિ રે આવું કે ઘેર કામ છે.
બાઈ મીરાં રહે પ્રભુ ગિરધરનાં ગુણ;
ચરણકમળમાં મુજ વિશ્રામ છે રે;
નંદલાલ નહિ રે આવું કે ઘેર કામ છે.