‘ક્ષમાને શા માટે રસાચવવી એ સમજાતું નથી.
'તું એની પાસે રહીશ એટલે એનું કારણ સમજાઇ જશે.’
‘મને એમ થાય છે કે આ બધી ઘટમાળ છોડી આપણે એક ઝૂંપડીમાં
જઈ વસીએ.’
‘તું જાણે છે કે હું ઝૂંપડીમાં જ વસું છું. મારું વહાણ પણ તને ઝૂંપડી
સરખું જ લાગશે.'
ઉલૂપીએ રોમન વહાણ તરફ દૃષ્ટિ કરી. ક્ષમા એક બારીએ ઊભી
ઊભી સુબાહુ અને ઉલૂપીની રમત નિહાળ્યા કરતી હતી. તેના હાથમાં
ધનુષ્યબાણ હોત તો બંને પ્રેમીઓને એ જ ક્ષણે વીંધી નાખત. આખી
રાજરમત, આખી યુદ્ધરમત પાછળ આ વ્યક્તિઓના વલણ કેવાં વહી રહ્યાં
હતાં ? એ વ્યક્તિઓનાં વલણ આખી સંસ્કૃતિના પ્રવાહ આગળ ડૂબી જવાં
જોઈએ. ઉલૂપી અને સુબાહુના વ્યક્તિગત પ્રેમ ઉપર આખા રોમન
સામ્રાજ્યનો ધસારો કેમ લાવી ન શકાય ?
સુબાહુ અને ઉલૂપી બંને વહાણના મધ્યભાગમાં અદૃશ્ય થયાં છતાં
ક્ષમા એ બારીએ જ ઊભી રહી. તે અત્યારે તો અસહાય હતી. તેની પાછળ
રક્ષકોની અનિમેષ આંખો ફર્યા જ કરતી હતી. તેને માટે સુંદર ભોજન
આવ્યું. તે તરફ તેણે સહજ પણ દૃષ્ટિ કરી નહિ. બારી પાસે બેસવા માટે
તેની આગળ એક આસન ગોઠવાયું. ક્ષમાને એ વિવેકની જરૂર ન હતી.
સૂર્યની માફક તે આખી ને આખી બળતી હતી. સૂર્ય અગ્નિપ્રવાહ બની
બધે ફેલાઈ જાય તો કેવું સારું ? ક્ષમાના દેહમાં વ્યાપેલો અગ્નિ આખા
આવિર્તને, શકસ્થાન, પલ્લવસ્થાન, એ સર્વવિરોધી ભૂમિઓને બાળી
નાખે એમ કેમ ન બને ? અને હવે તો તેનું ઉત્તુંગે કરેલું અપમાન એ અગ્નિને
વધારે જલદ બનાવે એમ થવું જોઈએ !
કેટલી ઘડી તે આમ ને આમ ઊભી રહી હતી તેનો તેને ખ્યાલ રહ્યો
નહિ. પોતાનું આખું પૂર્વજીવન તે વિચારી ગઈ. એ જીવન સ્વપ્ન હતું -
રોમન ભૂમિકા અને રોમન સંસ્કારવિજયની ચિત્રમાલા સરખું એ જીવન
ગઈ રાતે સમાપ્ત થયું. હવે ?
ક્ષમા બંધનમાં હતી, અસહાય હતી. એ અતિ મૂંઝવણભરી
પરિસ્થિતિમાંથી તેને માર્ગ કરવાનો હતો. એ માર્ગ સ્પષ્ટ થતો ન હતો.
આખો સમુદ્ર ખુલ્લો હતો. આખું અવકાશ ખુલ્લું હતું, છતાં એક માનવ
સ્ત્રીને સહજ પણ ચસવાનો માર્ગ ન હતો. માનવ સ્ત્રી ? માનવશ્રેષ્ઠ રોમન
પ્રજાનું સર્જન કરનારી સ્ત્રી !
એકાએક સામેના વહાણમાંથી એક હોડી ઊતરી, અને હોડીમાં