આ પાનું પ્રમાણિત થઈ ગયું છે.
તને હું જોઉં છું, ચન્દા ! કહે! તે એ જુએ છે કે ?
અને આ આંખની માફક−કહે, તેની રુએ છે કે ?
અને તવ નેત્રમાં તે નેત્રનું પ્રતિબિમ્બ જોવાને
વખત હું ખોઉં તેવો શું–કહે, તે એ ખૂએ છે કે ?
સખી ! હું તો તને જોતાં–અમે જોયેલ સાથે તે–
સ્મરન્તાં ના શકું સૂઈ ! કહે, સાથી સૂએ છે કે ?
સલુણી સુન્દરી ચન્દા ! ધરી તવ સ્વચ્છ કિરણોમાં–
હૃદયનાં ધોઉં છું પડ હું ! કહે, તે એ ધૂએ છે કે ?
નવ સૂઝે ઉપાય કૈં ડોલાય મારી કિસ્તી !
આવા તોફાનમાં જરૂર ડૂબશે મારી કિસ્તી !
ભવસમુદ્ર છે સમાનઃ
બચે જો હોય લખ્યું લખત !
સહસા તોયે આ વખત ઝુકાવી છે મેં કિસ્તી.
અન્ય દશા જોઈ ડરતઃ
ધીમે ધીમે ગતિ કરતઃ
પણ અરે ! આ તો તરત ઝુકાવી છે મેં કિસ્તી,
દેખી નહીં શકું ચન્દર;
કેમ દેખું ત્યારે બન્દર ?
મોજાં તોફાનીની અંદર ઝુકાવી છે મેં કિસ્તી !