આ પાનાનું પ્રુફરીડિંગ થઈ ગયું છે
( ૮૩ )
પવનતુરંગ પલાણીને આવ્યું ઘનદળ આમ!
જોતામાં સહુ દિશે ઝૂકી, કરે વૃષ્ટિપ્રહારો સહુ ઠામ; ૫
કહિં સંતાયેલી જો સેના મેઘની આવી રે,
દ્યૌદેવીને ગ્રહી લઈ જોરે અતિશ અકળાવી રે. ૬
ફરી વર્તાવ્યું સામ્રાજ્ય જો ઘનરાયે રે,
ક્યહાં સંતાયો રવિરાય, કંઈ ના જણાએ રે. ૭
આહા! પાછી જો પલટાઈ રચના કે'વી રે;
પડ્યે જાતી વૃષ્ટિની ધારા હેવી ને હેવી રે; ૮
તો એ કો કો સ્થળ રવિતેજ ભેદી પ્રકટ્યું રે;
દ્યુતિલીલા વૃષ્ટિની સંગ પ્રકાશી, આ શું રે! ૯
જે’વી કો મૃદુ સુંદરી રુદન કરંતી જાય,
મહિં વેરે સ્મિત ચળકતાં,- હેવી રચના આ રમ્ય જણાય. ૧૦
હવે જાશે ઘનનું જોર હેવું ભાસે રે,
અટક્યો વર્ષાઘાત, ને આમ જો આકાશે રે; ૧૧
છિન્ન ભિન્ન થયો શતખણ્ડ મણ્ડપ ઘનનો રે,
ને દેખાયો ભૂરો ગભીર ઉદધિ ગગનનો રે; ૧૨
ભૂરા ઊંડા એ સાગરમાંહિં ધરી દ્વીપલીલા રે,
શા મેધખણ્ડ સુવિશાળ ઠર્યા રંગીલા રે ! ૧૩
