પદ ૧.
મીઠડાં ગોરસ લ્યો ગોરસ લ્યો એ રાગ.
હાં રે કોઈ માધવ લ્યો, માધવ લ્યો, વેચંતી વૃજનારી રે ... હાં રે
માધવને મટુકીમાં ઘાલી, ગોપી લટકે લટકે ચાલી રે, ... હાં રે
હાં રે ગોપી ઘેલું શું બોલતી જાય, કાન મટુકીમાં ન સમાય રે ... હાં રે
નવ માનો તો જુવો ઉતારી, માંહી જુવે તો કુંજવિહારી રે, ... હાં રે
વંદ્રાવનમાં જાતા ધારી, વા’લો ગૌ ચારે છે ગિરધારી રે ... હાં રે
ગોપી ચાલી વંદ્રાવન વાટે, સઉ વ્રજની ગોપીયો સાથે રે, ... હાં રે
મીરાં કહે પ્રભુ ગીરધર નાગર, જેના ચરણકમલ સુખસાગર રે ... હાં રે
પદ ૨.
અરજ કરે છે મીરાં રાંકડી, ઊભી ઊભી અરજ કરે છે મીરાં રાંકડી, ટેક૦
માણિગર સ્વામી મારે મંદીરે પધારો, સેવા કરુ દિન રાતડી. ઊભી૦ ૧
ફૂલના રે તોરા ને ફૂલના રે ગજરા, ફુલના તે હાર ફુલ પાંખડી. ઊભી૦ ૨
ફૂલની તે ગાદી ને ફુલના રે તકિયા, ફુલની તે પાથરી પછોડી ઊભી૦ ૩
પય પકવાન મીઠાઇ ને મેવા, સેવૈયા ને સુંદર દહીડી. ઊભી૦ ૪
લવીંગ સોપારી ને એલચી તજવાળી, કાથા ચૂનાની પાનબીડી ઊભી૦ પ
સેજ બિછાવું ને પાસા મગાવું, રમવા આવો તો જાય રાતડી ઊભી૦ ૬
મીરાંબાઇ કહે પ્રભુ ગિરધરનાગર, તમને જોતામાં ઠરે આંખડી ઊભી૦ ૭
