સોમના૦—બાપા, અજવાળી રાત કેવી સારી શોભે છે? અને આ ગામનું પાદર પણ કેવું રળિયામણું દેખાય છે.
રધના૦—અજવાળી રાતે રોજ અહીં આવતા હઇએ તો સારૂં.
સોમના૦—જીવરામભટ્ટને ગામથી આવવાનો રસ્તો તો આ છે; પણ જીવરામભટ્ટ ક્યાંઇ જણાતા નથી.
રઘના૦—જો, આટલામાં ક્યાંઇ હશે.
સોમના૦—અરે,આટલામાં તો ક્યાંઇએ નથી. એ તો રતાંધળો ક્યાંઇ ચઢી ગયો હશે.
રઘના૦—એક બે ઘાંટા કાઢીને બોલાવ જોઇએ. આટલામાં હશે તો બોલશે.
સોમના૦— એ ! ! ! જીવરામભટ્ટ, જીવરામભટ્ટ — બાપા, અહીં તો કોઇ બોલતું નથી.
રંગલો—ઘાંટો ક્યાં કાઢી શકે છે? એમ બોલાવાય કે આમ બોલાવાય? હે ! ! ! જીવરામભટ્ટ, જીવરામભટ્ટ, હે ! ! ઉ, એમ બોલાવય.
રઘના૦—રસ્તાની આજુબાજુએ જો, ક્યાંઇ ઉંઘી ગયો હશે.
સોમના૦—ખાડને કાંઠે કાંઇક લૂગડાં જેવું જણાય છે. વળી સુવાવડીના ગાભા જેવું કાંઇક છે.
રઘના૦—જા, જઇને જો. રતાંધળો છે, માટે ખાડમાં પડી ગયો ન હોય.
જીવરા૦—(સુતો સુતો બબડે છે) જો રાંડનો, મારો સસરો થઇને મને રતાંધળો
