સૂત્ર૦—સાબાશ ! હવે મારી ખાતરી થઈ કે તું હાસ્યરસની[૧] પુષ્ટિ કરી શકશે.
રંગલો—હવે આ જંગલમાં પ્રથમ કોણ આવનાર છે તે તો કહો ?
સૂત્ર૦—પ્રથમ રતાંધળો જીવરામભટ્ટ આવનાર છે, તેની સાથે તું વાતચીત કરજે. કેમકે તે પણ તારા જેવો મિજાજી છે.
રંગલો—ઠીક છે, આવવા દો.
રંગલો—તાથેઇ, તાતાથેઇ ભલા.
જીવ૦—(ઉભા રહે છે.)
રંગલો—કેમ છે, જીવરામભટ્ટ ?
જીવ૦—(ડોક વાંકી કરીને) કોણ એ !
રંગલો—જાઓ મારા સાહેબ, નથી ઓળખતા કે શું ?
જીવ૦—કાંઇ ઓળખાણ પડી નહિ.
રંગલો—આપણે નજદીકના સગા છીએ, તો પણ તમે ઓળખતા નથી, એ કેવી વાત છે?
જીવ૦—આ અમારા સસરાના ગામની સીમમાં તે અમારૂં નજદીકનું સગું કોણ છે ? શું તું અમારો સાળો છે ?
રંગલો—તમારો સાળો તો તમારી વહુનો ભાઇ હોય તે.શાસ્ત્રમાં પણ કહ્યું છે કે—
જીવ૦—ત્યારે તું અમારો સસરો થાય છે?
રંગલો—સસરો તો વહુનો બાપ હોય તે.માટે તમારી વહુને પૂછી જોજો કે હું એનો બાપ છું?
જીવ૦—(ગુસ્સે થઇને) ત્યારે તું અમારો શો સગો થાય છે?