સમુઝિ કામસુખુ સોચહિં ભોગી। ભએ અકંટક સાધક જોગી ॥
છં . જોગિ અકંટક ભએ પતિ ગતિ સુનત રતિ મુરુછિત ભઈ।
રોદતિ બદતિ બહુ ભાઁતિ કરુના કરતિ સંકર પહિં ગઈ।
અતિ પ્રેમ કરિ બિનતી બિબિધ બિધિ જોરિ કર સન્મુખ રહી।
પ્રભુ આસુતોષ કૃપાલ સિવ અબલા નિરખિ બોલે સહી ॥
દો. અબ તેં રતિ તવ નાથ કર હોઇહિ નામુ અનંગુ।
બિનુ બપુ બ્યાપિહિ સબહિ પુનિ સુનુ નિજ મિલન પ્રસંગુ ॥ ૮૭ ॥
જબ જદુબંસ કૃષ્ન અવતારા। હોઇહિ હરન મહા મહિભારા ॥
કૃષ્ન તનય હોઇહિ પતિ તોરા। બચનુ અન્યથા હોઇ ન મોરા ॥
રતિ ગવની સુનિ સંકર બાની। કથા અપર અબ કહઉઁ બખાની ॥
દેવન્હ સમાચાર સબ પાએ। બ્રહ્માદિક બૈકુંઠ સિધાએ ॥
સબ સુર બિષ્નુ બિરંચિ સમેતા। ગએ જહાઁ સિવ કૃપાનિકેતા ॥
પૃથક પૃથક તિન્હ કીન્હિ પ્રસંસા। ભએ પ્રસન્ન ચંદ્ર અવતંસા ॥
બોલે કૃપાસિંધુ બૃષકેતૂ। કહહુ અમર આએ કેહિ હેતૂ ॥
કહ બિધિ તુમ્હ પ્રભુ અંતરજામી। તદપિ ભગતિ બસ બિનવઉઁ સ્વામી ॥
દો. સકલ સુરન્હ કે હૃદયઁ અસ સંકર પરમ ઉછાહુ ।
નિજ નયનન્હિ દેખા ચહહિં નાથ તુમ્હાર બિબાહુ ॥ ૮૮ ॥
યહ ઉત્સવ દેખિઅ ભરિ લોચન। સોઇ કછુ કરહુ મદન મદ મોચન।
કામુ જારિ રતિ કહુઁ બરુ દીન્હા। કૃપાસિંધુ યહ અતિ ભલ કીન્હા ॥
સાસતિ કરિ પુનિ કરહિં પસાઊ। નાથ પ્રભુન્હ કર સહજ સુભાઊ ॥
પારબતીં તપુ કીન્હ અપારા। કરહુ તાસુ અબ અંગીકારા ॥
સુનિ બિધિ બિનય સમુઝિ પ્રભુ બાની। ઐસેઇ હોઉ કહા સુખુ માની ॥
તબ દેવન્હ દુંદુભીં બજાઈં । બરષિ સુમન જય જય સુર સાઈ ॥
અવસરુ જાનિ સપ્તરિષિ આએ। તુરતહિં બિધિ ગિરિભવન પઠાએ ॥
પ્રથમ ગએ જહઁ રહી ભવાની। બોલે મધુર બચન છલ સાની ॥
દો. કહા હમાર ન સુનેહુ તબ નારદ કેં ઉપદેસ।
અબ ભા ઝૂઠ તુમ્હાર પન જારેઉ કામુ મહેસ ॥ ૮૯ ॥
માસપારાયણ,તીસરા વિશ્રામ
સુનિ બોલીં મુસકાઇ ભવાની। ઉચિત કહેહુ મુનિબર બિગ્યાની ॥
તુમ્હરેં જાન કામુ અબ જારા। અબ લગિ સંભુ રહે સબિકારા ॥
