આ પાનાનું પ્રુફરીડિંગ થઈ ગયું છે
એની સંમતિ સાધી રે શીળી–શીળી ધાર સજું ,
જગકારણ જોને રે હસી-હસી પ્રાણ ત્યજું.
મરું તોય ન મૂકું રે સ્વભાવનો સ્નેહ કદી,
ફુલડાં સમ ફોરાં રે ઝીણાં દઈ જાળવતી;
એવાં પુણ્યથી પામું રે ફરી સુરધામ સખિ !
એ જ જોડ અમારી રે હમેશ રહે હરખી.
(પૂજું ગણપતિના પાય ( ૨ )
પૂજું અંબિકાની પાવડી રે લોલ–એ ઢાળ)
હું તે આંગણિયે આજ (૨)
ફુલ વેલીનાં વીણતી રે લોલ;
એની શીળી સુવાસ (૨)
હૃદય રીઝીને ઝીલતી રે લોલ.
ડસ્યો કાળુડો નાગ (૨)
એક આવીને આકરો રે લોલ;
આવે અન્ધારી આંખ (૨)
જવા ઊડે શો જીવડો રે લોલ ?
કરે સાસુ કલ્પાન્ત (૨)
જોઈ જેઠાણી ઝૂરતાં રે લોલ;