આ પાનું પ્રમાણિત થઈ ગયું છે.
સંગીતસમાધિ
માનવી વસવાટમાં પણ વર્ગો પાડે છે. કોમવાર વર્ગો હવે બદલાઈ ગયા છે અને ધનવાર વર્ગો પડતા જાય છે. મધ્યમ વર્ગ અને ગરીબ વર્ગના મહોલ્લાની સરહદ ઉપર આવેલા એક ખડકીબંધ ધરની પાસે ઊભાં રહી છસાત માણસો કોઈને શોધતાં દેખાયાં.
‘કોનું કામ છે?’ ખડકીમાં આવેલા બીજા ઘરમાંથી કોઈ યુવાને પૂછ્યું.
‘ગુરુનું.’ ઘર શોધતાં માણસોમાંથી એકે કહ્યું.
‘ગુરુનું ! અહીં તો કોઈ...’
‘ઉસ્તાદનું.’
‘અહીં કોઈ મુસલમાન રહેતું નથી.’
‘પંડિતજીનું.’
‘ઘર ભૂલ્યા લાગો છો. પંડિતબંડિત કોઈ અહીં છે નહિ.’
‘કેમ? બારેક વર્ષ ઉપર એક ગવૈયા અહીં..’
‘હાં...હાં. સારંગધર ગવઈ ! એતો પથારીવશ છે. એમને એક ઓરડીમાં સુવાડ્યા છે.’
‘અમારે એમનાં દર્શન કરવાં છે.’
‘દર્શન? થોડા દિવસન પરોણા છે. એમને પડી રહેવા દો તો સારું.’
‘શું થયું છે?’
‘શું નથી થયું એમ પૂછો.’
‘એમને પગે પડ્યા વગર પાછા જવું નથી.’
