બાળકાનુડો
♦ ચાલી ચાલી ગોકુળની વ્રજનાર કે મહીંડા વેચવા રે લોલ ♦
કાનુડા ! કહેને મુજને તું કદી હૂતો કે મારા જેવો નાનુડો રે લોલ?
મારા જેવો નાનુડો તે થયો ક્યાંથી કે આવો મોટો કાનુડો રે લોલ ? ૧
કાનુડા ! કહે, કેવું તુજને ગમતું ગોકુળ ગામમાં રે લોલ?
ગમ્યું ત્યાં શું તારલિયાથી વધતું કે ગોપીઓના ધામમાં રે લોલ ? ૨
કાનુડા ! તેં પૂછ્યું કદી તુજ બાને કે ક્યાં છે મારી દેવીઓ રે લોલ?
રોઈ રોઈ પૂછું હું તો બાને કે ઢીંગલી શી એવી ઓ રે લોલ ? ૩
કાનુડા ! તું રમતો તારા-લખોટા કે ચંદા કેરી ફેરીએ રે લોલ?
માડી શેં ન મુજને દેતી એ તારા કે રમવા શેરીએ રે લોલ ? ૪
કાનુડા ! શું રોતો ઘડી ધડી સહેજે કે મહીડાં ચાખવા રે લોલ?
બા શું હૈયે ચાંપી દેતી ખાવા કે છાનો રાખવા રે લોલ ? ૫
કાનુડા ! તે કૂંળાં કૂંળાં હૈયાં કે કહીં તે દીઠડાં રે લોલ?
બાશું ઘડીએ ઘડીએ લેતી કે ચુંબન મીઠડાં રે લોલ ? ૬
કાનુડા ! શું જશોદા માતા તારી કે ગાતી રાતે હાલરડાં રે લોલ?
ઉં-ઉં કરી સુણવા એ અમે રોઇયે કે માતાનાં બાલુડાં રે લોલ ? ૭
કાનુડા ! શું બાપુજી તોજ તારે માટે કે સુખડી લાવતા રે લોલ?
લેવા જાઉં સામે ત્યાં મને ઊંચકી કે ખભે ચઢાવતા રે લોલ ? ૮