આ પાનાનું પ્રુફરીડિંગ થઈ ગયું છે
અંજલિ ગીતો
૯૯
ભૂલ્યો તોય હશે સત્પંથે : ડૂલ્યો તોય મનુજઉરઘાટ :
એની નાનમ ગઇ વપુ સાથે : એની મોટપ આપણ માટ !
એનાં સ્વપ્ન ફળ્યાં ને ફાલ્યાં,
એનાં ચિત્ર ઊઠ્યાં ને ચાલ્યાં,
એણે ઢાક્યાં સત્ય ઉઘાડ્યાં ને બતલાવી વિક્રમ વાટ :
એનો ટેક ડગ્યો ન લગીર :
બાંકો એ નર્મદવીર !
લાખો એ નર્મદવીર !
ધન ધન હો નર્મદવીર !
તુંને કોણે ગરવી કહી સંબોધી, હો મુજ ગુર્જરમાત ?
કોણે દિશદિશ ઘૂમી અજવાળી તુજ ઊંચી સુંદર જાત ?
કોણે દૂધ તારાં દીપાવ્યાં ?
તુંમય થઇ તુજ તેજ બઢાવ્યાં ?
ગુણવંતી ગુજરાતે નર્મદ, નર્મદથી ગરવી ગુજરાત !
કોણ થયો તુજ કીર્તિ-અધીર ?—
વિરલો એ નર્મદવીર !
હીરલો એ નર્મદવીર !
ધન ધન હો નર્મદવીર !
