આ પાનાનું પ્રુફરીડિંગ થઈ ગયું છે
૧૨૦
રાષ્ટ્રિકા
ગુર્જરીના કવિકોકિલ નાનાલાલ હો !
રસલીલી ખીલી તુજ હૃદયવસંત જો ;
તુજ ટહુકે મૉર્યાં ગુર્જર આકાશ આ,
દિશદિશની ઊઘડી કંઇ દેવદિગંત જો.
ગુર્જરીના કવિકોકિલ નાનાલાલ હો ! ૧
વનઉપવન ગાજે તુજ મધુરા શબ્દથી,
પંખીડાં પૂરે કંઇ કિલકિલ નાદ જો ;
તુજ પડઘા ઝીલે કંઇ કંઇ રસબાલુડાં,
જાદુગારા છે તુજ ગાનપ્રસાદ જો !
ગુર્જરીના કવિકોકિલ નાનાલાલ હો ! ૨
તારા સ્વરબ્રહ્માંડે બ્રહ્મ સભર ભર્યો,
તુજ સૂરે ફૂટ્યાં નવતારકલોક જો !
તુજ પ્રશ્નોની માળા વ્યોમગળે ઝૂલે,
દીઠા-અણદીઠા તુજ ઊંચા ગોખ જો !
ગુર્જરીના કવિકોકિલ નાનાલાલ હો ! ૩
