પૃષ્ઠ:Rashtrika - Gu - By Ardeshar Khabardar - 1940.pdf/૧૪૦

૧૩૨

રાષ્ટ્રિકા

 

---

⁠ક્યાં ગંગા, જમુના વળી બ્રહ્મપુત્ર સરિતા તે ?
⁠ક્યાં સિંધુ, તાપી, નર્મદા, સાભ્રમતી ક્યાં તે ?
⁠ક્યાં કૃષ્ણા, ગોદાવરી અને કાવેરી ?
⁠ક્યાં મહાનદી ને મહી ? — શૂરજળઘેરી !
એ સર્વ નદીનું પૂર ઊછળતું ગયું હવે શું ચડી ચડી ?
⁠ગયું હવે શું ચડી ચડી ?
ભરતભૂમિના શૂરપુત્ર તે રહ્યા અમે શું રડી રડી ? ૨

⁠ક્યાં ગયું બ્રહ્મનું તેજ ? શૌર્ય ક્ષત્રીનું ?
⁠ક્યાં ગઈ વૈશ્યની વૃત્તિ ? - થયું સહુ હીણું ?
⁠શું ગયા શૂર રજપૂત, ધરા ધ્રૂજાવી ?
⁠શું ગયા મરાઠા વીર, આણ વરતાવી ?
એ સહુની હવે શું કથી કથીને વાત જ કરશું બડી બડી ?
⁠વાત જ કરશું બડી બડી ?
ભરતભૂમિના શૂરપુત્ર તે રહ્યા અમે શું રડી રડી ? ૩

⁠શી યુરોપકેરી ધજા આજ ફરકાયે !
⁠શી વૃદ્ધિ કરી છે આજ અમેરીકાએ !
⁠જાપાન મચ્યું શું આજ, ધરા કંપાવી !
⁠જગ જોઇ રહ્યું છે શૌર્ય, કુતુક દર્શાવી !
શું અમે જ ત્યારે સૂતા થાકી ખૂબ પરસ્પર લડી લડી ?
⁠ખૂબ પરસ્પર લડી લડી ?
ભરતભૂમિના શૂરપુત્ર તે રહ્યા અમે શું રડી રડી ? ૪