આ પાનાનું પ્રુફરીડિંગ થઈ ગયું છે
૧૮૦
રાષ્ટ્રિકા
સ્વપ્ન
• રાગ-ભૈરવી-તાલ લાવણી •
તારું સ્વપ્ન ન કો દે ભૂંસી રે, હો રણરઢિયાળા !
ભલે તેગ રુધિર લે ચૂસી રે, હો રણરઢિયાળા !
આભથકી તુજ કાજ ઊતરતા
જુગજુગના સંદેશ ;
ઘોર વહે અંધાર ભલે, પણ
પડે ન ઝાંખા લેશ :
જોની ઝગમગતા એ તારા રે, હો રણરઢિયાળા !
એના પંથ સદા અંધારા રે, હો રણરઢિયાળા !-- તારું. ૧
દિનભર શોરબકોર મચાવે,
જગત બને પ્રતિકૂળ ;
નહિ તુજ અંતરાઆંખ બિડાવે,
આભ ભરી દે ધૂળ :
તારી જ્યોતિ ન કો હોલાવે રે, હો રણરઢિયાળા !
ભલે વાવાદળ ડોલાવે રે, હો રણરઢિયાળા !-- તારું. ૨
