આ પાનાનું પ્રુફરીડિંગ થઈ ગયું છે
૩૦
રાષ્ટ્રિકા
કોણે વાઘતણા મુખમાં મૂક્યો નિજ હાથ નિડર ભરટેક ?
કોણે કારાગૃહ સ્વીકાર્યું હસ્તે મુખ કરતાં અહાલેક ?
કોણે સત્ય અહિંસા માટે
ઝીલ્યા ઘા જ્યાં પથ્થર ફાટે ?
કોનાં નરનારી ને બાળક ઊભાં વીર બની પ્રત્યેક ?
કોણે અસુર કીધા સૌ મહાત ? --
સૌની પહેલી ગુજરાત !
સૌની પહેલી ગુજરાત !
ગુજરાત જ રે ગુજરાત !
કાયર, ડરકણ, બીકણ, ભીરુ : હાકે ધ્રુજતાં જેનાં હાડ ;
નબળા, ઢીલા, પોચા, જડસા : સહેજે તૂટતી જેની નાડ :
એવા સૌમાં જે બોલાતા ,
એવા પુત્રતણી જે માતા ,
તેણે એ પુત્રોની સાથે કેવી પ્રથમ પડાવી ત્રાડ ?
કોણે કીધી પ્રાણબિછાત ? --
સૌની પહેલી ગુજરાત !
સૌની પહેલી ગુજરાત !
ગુજરાત જ રે ગુજરાત !
