મુજ અબળાને મોટી મીરાત
| મુજ અબળાને મોટી મીરાત મીરાંબાઈ |
મુજ અબળાને મોટી મીરાત બાઈ; શામળો ઘરેણું મારે સાચું રે. - ટેક
વાળી ઘડાવું વિઠ્ઠલ વર કેરી; હાર હરિનો મારે હઇયે રે.
ચિત્તમાળા ચતુરભૂજ ચૂડલો; શીદ સોની ઘેર જઈયે રે. મુજ.
ઝાંઝરિયાં જગજીવન કેરાં; કૃષ્ણજી કલ્લાં ને કાંબી રે;
વિંછુવા ઘુઘરા રામ નારાયણના; અણવટ અંતરજામી રે. મુજ.
પેટી ઘડાવું પુરુષોત્તમ કેરી; ત્રિકમ નામનું તાળું રે.
કુંચી કરાવું કરુણાનંદ કેરી; તેમાં ઘરેણું મારું ઘાલુંરે. મુજ.
સાસરવાસો સજિને બેઠી; હવે નથી કંઈ કાચું રે;
મીરાંબાઈ કહે પ્રભુ ગિરધરનાગર; હરિને ચરણે જાચું રે.
અન્ય સંસ્કરણ
મુજ અબળાને મોટી મીરાત બાઈ;
શામળો ઘરેણું મારું સાચું રે.
વાળી ઘડાવું વિઠ્ઠલવર કેરી;
હાર હરિનો મારે હૈયે રે.
ચિત્તમાળા ચતુરભૂજ ચૂડલો;
શીદ સોની ઘેર જઈએ રે.
ઝાંઝરિયાં જગજીવન કેરાં;
કૃષ્ણજી કલ્લાં ને રાંબી રે.
વિંછુવા ઘૂઘરા રામ નારાયણના;
અણવટ અંતરજામી રે.
પેટી ઘડાવું પુરુષોત્તમ કેરી;
ત્રિકમ નામનું તાળું રે.
કૂંચી કરાવું કરુણાનંદ કેરી;
તેમાં ઘરેણું મારું ઘાલું રે.
સાસરવાસો સજીને બેઠી;
હવે નથી કંઈ કાચું રે.
બાઈ મીરાં કહે પ્રભુ ગિરધર નાગર;
હરિને ચરણે જાચું રે.