રબારણ
| રબારણ અજ્ઞાત |
રબારણ
આવો રબારણ હો ! મ્હારે નેસલડે,
હૈયાનાં પાવું અમીડાં રે :
રબારણ હો ! મ્હારે નેસલડે.
મ્હારો નેસલડો હો! કે વનની વચ્ચે, રબારણ !
જાને છે કોક જાણનાર :
રબારણ હો ! મ્હારે નેસલડે.
ઘમ્મર વલોણાં હો! કે નેસને ગર્ભે, રબારણ !
તાણે છે કોક તાણનાર :
રબારણ હો ! મ્હારે નેસલડે.
ચમકાવે ચાંદની હો ! કે મ્હારાં મહીડાં, રબારણ !
જાને છે કોક જાણનાર :
રબારણ હો ! મ્હારે નેસલડે.
મોંઘા માખણિયાં હો! ઉતારવા ઘૂમો, રબારણ !
લ્હાણે છે કોક લ્હાણનાર :
રબારણ હો ! મ્હારે નેસલડે.
સ્વાદ અનબોટ્યો હો ! અંતરના રસનો, રબારણ !
માણે છે કોક માણનાર :
રબારણ હો ! મ્હારે નેસલડે.