રાસચંદ્રિકા/પંખીડું
| ← કમળતલાવડીનો હંસલો | રાસચંદ્રિકા પંખીડું! અરદેશર ખબરદાર |
કિરણ → |
પંખીડું!
♦ ગરબી*[૧]. ♦
કૂવામાંનાં પાણી આવે હવાડાની માંય,
મારાં હૈડાંનાં હેત એવાં આંખે છલકાય :
સખી ! પંખીડું કો બોલે મારે બારણે રે લોલ. ૧
ઊંચી નીચી વાદળી ને વીજળીના ખેલ,
એવી ઝબૂકે છે આશા મારા મનડાને મહેલ :
સખી ! પંખીડું કો પલકે મારે બારણે રે લોલ. ૨
અંધારિયા આંગણામાં ચાંદનીના ચોક,
એવાં ફૂલડાં વેરાય મારાઆતમાને ગોખ :
સખી ! પંખીડું કો ઝૂકે મારે બારણે રે લોલ. ૩
નીલે નીલે આભે રેલે કાળા ધોળા મેઘ,
મારી નિંદર રેલાય એવા સોણલાંના વેગ :
સખી ! પંખીડું કો ખેલે મારે બારણે રે લોલ. ૪
લીલા વનના હીંચકા ને લટકાળા મોર,
મારે મંદિર કો મહાલે એવા ચિત્તડના ચોર :
સખી ! પંખીડું કો હીંચે મારે બારણે રે લોલ. ૫
વીંધતી વસંત ફોરે કુંજે કુંજે ફૂલ,
મારી કીકીના પલકારમાં તો દુનિયા છે ડૂલ :
સખી ! પંખીડું કો થંભે મારે બારણે રે લોલ. ૬
ચંબેલીના તારલા ને મોગરાના ચંદ,
મારે નેહે ખીલે સાથે એવાં તેજ ને સુગંધ :
સખી ! પંખીડું કો ઝીળે મારે બારણે રે લોલ. ૭
આંબે આંબે કોકિલા ને વડલે વડલે વાત,
મારાં નેણમાંનું નામ બોલે દિવસ ને રાત :
સખી ! પંખીડું કો ટૌકે મારે બારણે રે લોલ. ૮
હિમાલયના હંસલા ને માનસરના તીર,
આભે ઊડી જાઉં એવી મારા આત્માની અધીર !
સખી ! પંખીડું કો પેસે મારે બારણે રે લોલ. ૯
- ↑ ** * આ ગરબી નવી રચી છે. રાગ જીલ્લો - તાર કેરબો.