વૃંદાવન મોરલી વાગે છે

વૃંદાવન મોરલી વાગે છે
મીરાંબાઈ


૧૦

વાગે છે રે વાગે છે, વૃંદાવન મોરલી વાગે છે તેનો શબ્દ ગગનમાં ગાજે છે. ટેક.
વૃંદા તે વનને મારગ જાતાં, વા’લો દાણ દધિનાં માગે છે. વૃં૦
વૃંદા તે વનમાં રાસ રચ્યો છે, વા’લો રાસમંડળમાં બિરાજે છે. વૃં૦
પીળાં પીતાંબર જરકસી જામા, હાથે પીળો પટકો બિરાજે છે. વૃં૦
કાને તે કુંડળ માથે મુગટ ને, મુખ પર મોરલી બિરાજે છે. વૃં૦
વૃંદા તે વનની કુંજગલીનમાં, વા’લો થનક થૈ થૈ નાચે છે. વૃં૦
બાઈ મીરાં કે પ્રભુ ગિરધર નાગર, દર્શનથી દુઃખડાં ભાંગે છે. વૃં૦