ઓખાહરણ/સ્તુતિ
< ઓખાહરણ
| ઓખાહરણ સ્તુતિ પ્રેમાનંદ |
કડવું-૧ → |
| રાગ:આશાવરી |
શ્રી ગણેશાય નમઃ
મહાકવિ પ્રેમાનંદ કૃત
ઓખાહરણ
શ્રી ગણેશજીની પ્રાર્થના
રાગ આશાવરી
એક નામ મુજને સાંભર્યું, શ્રી ગૌરીપુત્ર ગણેશ;
પાર્વતીના અંગથી ઉપન્યો, તાત તણો ઉપદેશ. (૧)
માતા જેની પાર્વતી ને, પિતા શંકરદેવ;
નવખંડમાં જેની સ્થાપના, કરે જુગ ભુતળ સેવ. (૨)
સિંદુરે શણગાર સજ્યા, ને કંઠે પુષ્પના હાર;
આયુદ્ધ ફરસી કર ધરીને, હણ્યા અસુર અપાર. (૩)
પહેલા કરમાં જળકમંડળ, બીજે મોદિક આહાર;
ત્રીજા કરમાં ફરસી સોહીએ, ચોથે રે જપમાળ. (૪)
ચાલો સહિયરો દેરે જઈએ, પૂજીએ ગણપતિરાય;
મોટા લીજે મોદિક લાડુ, લાગીએ શંભુસુતને પાય. (૫)
એવા દેવ સાચા મુનિવાચા, પૂરે મનની આશ;
બેઉ કર જોડી કહે જન વૈષ્ણવ, દાસ તણો જે દાસ. (૬)