કલાપીનો કેકારવ/સનમની શોધ
| ← સનમની યારી | કલાપીનો કેકારવ સનમની શોધ કલાપી |
સનમને સવાલ → |
સનમની શોધ
પેદા થયો છું ઢૂંઢવા તુંને, સનમ!
ઉમ્મર ગુઝારી ઢૂંઢતાં તુંને, સનમ!
છે દુશ્મન લાખો ભુલાવા રાહને,
દુશ્મન બનાવી યાર અંજાયો, સનમ!
ગફલત મહીં હું, ઝાલિમો કાબિલ એ;
જુદાઈ યારોની મઝા એને, સનમ!
જે રાહદારીમાં અમોને લૂંટતું,
ઉમેદ બર આવો નહીં એની, સનમ!
તારી મદદ કોને હશે, માલૂમ નહીં;
શું યારના દુશ્મન સહે યારી? સનમ!
પાંચે નમાઝે ઝૂકતાં ત્હારે કદમ,
આડા ફરે છે બેખુદાઓ એ, સનમ!
છો દમબદમ ખંજર રમે ત્હારું દિલે;
કાફર તણું કાતિલ ખેંચી લે, સનમ!
તું માફ કર, દિલદાર ! દેવાદાર છું !
છે માફ દેવાદારને મ્હારા, સનમ!
કાંઈ નઝરબક્ષી થવી લાઝિમ ત્હને;
ગુઝરાનનો ટૂકડો ઘટે દેવો, સનમ!
પેદા થઈને ના ચૂમી ત્હારી હિના;
પેદા થયો છું મોતમાં જાણે, સનમ!
શાને કસે છે મુફત આ લાચારને?
દાવો સુનાનો છે હમારો ના, સનમ!
પત્થર બની પેદા થયો છું પ્હાડમાં,
છું ચાહનારો એ ય તુંથી છું, સનમ!
૧૮૯૯