ગુજરાતની ગઝલો/સનમને સવાલ(સાગર)

← તરુણું તરલાનું પ્રેમગાન

ગુજરાતની ગઝલો સનમને સવાલ [[સર્જક:|]] ૧૯૪૩

દરગાહ બસ મુજ કત્લગાહ →

સાગર

૬૮ : સનમને સવાલ

શબ્દ? સનમ ! આપશે? પૂછું? સનમ ! જિવાડશે?
દિલથી દિલ દબાવશે ? તું ગોદમાં સુવાડશે ?
અગર-છું હું તુજ શિકાર:
કત્લનો ય તલબગારઃ
યારની અમર કટારઃ
ઘા પૂરો લગાવશે ?

વીતી જતાં વરસ વરસઃ
જિગરમાં મગર તરસઃ
તો-સનમ ! પૂછું છું બસઃ
પૂરું કરી પિવાડશે?

લાગી, સનમ ! દિલલગન?
શી રોમ રોમ આ અગન?
કિસ્મતે ફક્ત રુદન ?
સૂકું સુમન ! ખિલાવશે?

જિગર જપે એક યારઃ
ઈશ્ક યારનો પુકાર:
તો કટાર યા દિદાર?
યાર ! કૈં ચખાડશે?

રગરગે તૂંહિ તમામઃ
જે ચીરી અય ! નેકનામ !
આવશે કશું ય કામ?
આમ યા જલાવશે ?

અસ્થિ, માંસ, ચર્મમાં:
વિચાર, વાણી, કર્મમાં:
સનમ ! શરાબી ધર્મમાં–
કદમ કહે ! ઠરાવશે?

યાર કે છું અરજદાર?
યા હજી ઉમેદવાર ?

કે સનમ ! હું ભટકનાર?
કંઈ જવાબ આપશે?.

હું તને શું? બોલ! બોલ!
તું મને શું ? ભેદ ખોલ !
દદ બોલ ! ઈશ્ક બોલ !
ક્યાં સુધી તપાવશે ?

જિગર જો ! કર્યું હર્રાજ:
પહેર્યું તુજ ફકીરી તાજ:
તો-કદમનું અમર રાજ-
જિગરમાં જમાવશે?

શબ્દ ? આપશે, સનમ?
જીવ્યું જિતાડશે, સનમ ?
સૂવે તું ત્યાં, કહે ! સનમ?
શું ગોદમાં સુવાડશે?