ન્હાના ન્હાના રાસ/સૂનાં સૂનાં સ્નેહધામ
| ← એ દિવસો | ન્હાના ન્હાના રાસ - ભાગ ૧ સૂનાં સૂનાં સ્નેહધામ ન્હાનાલાલ કવિ |
વસન્તમાં, સખિ! → |
૩૬
અબોલડા
૧.
સૂનાં મન્દિર, સૂનાં માળિયાં,
ને મ્હારા સૂના હૈયાના મ્હેલ રે,
સ્નેહધામ સૂનાં સૂનાં રે:
આધી આશાઓ મ્હારા ઉરની,
કાંઇ આઘા આઘા અલબેલરે,
સ્નેહધામ સૂનાં સૂનાં રે.
૨.
સૂના સૂના તે મારા ઓરડા,
ને એક સૂની અન્ધારી રાત રે,
સ્નેહધામ સૂનાં સૂનાં રે:
પાનાં પ્રારબ્ધનાં ફેરવું,
મંહી આવે વિયોગની વાત રે,
સ્નેહધામ સૂનાં સૂનાં રે.
૩.
સૂની વસન્ત, સૂની વાડીઓ,
મ્હારાં સૂનાં સ્હવાર ને બપ્પોરરે,
સ્નેહધામ સૂનાં સૂનાં રે:
સહિયર સંઘ હું બ્હાવરી
મ્હારે ક્ય્હાં છે કળાયેઅ મોર રે?
સ્નેહધામ સૂનાં સૂનાં રે.
૪.
સૂનું સૂનું આભ આંગણું,
ને વળી સૂની સંસારની વાટ રે
સ્નેહધામ સૂનાં સૂનાં રે:
માથે લીધાં જળબેડલાં,
હું તો ભૂલી પડી રસઘાટ રે,
સ્નેહધામ સૂનાં સૂનાં રે:
૫.
સૂની સૂની મ્હારી આંખડી
ને પેલો સૂનો આત્માનો આભ રે,
સ્નેહધામ સૂનાં સૂનાં રે:
પ્રીતમ ! પ્રેમ કેમ વીસર્યા?
એવો દીઠો અપ્રીતમાં શું લાભ રે?
સ્નેહધામ સૂનાં સૂનાં રે.
૬.
સૂનાં સૂનાં ફૂલે ફૂલડાં,
મ્હારાં સૂનાં સિંહાસન, કાન્ત રે!
સ્નેહધામ સૂનાં સૂનાં રે:
આંબાની ડાળી મ્હોરે નમી,
મંહી કોયલ કરે કલપાન્ત રે,
સ્નેહધામ સૂનાં સૂનાં રે.
૭.
સૂનો સૂનો મ્હારો માંડવો,
ને ચારૂ સૂનાં આ ચન્દની ચોક રે,
સ્નેહધામ સૂનાં સૂનાં રે:
રસિયાને રંગમ્હેલ એકલી,
મ્હારે નિર્જન ચૌદેય લોક રે,
સ્નેહધામ સૂનાં સૂનાં રે.
૮.
સૂનો હિન્ડોલો મ્હારા સ્નેહનો,
ને કાંઇ સૂનો આ દેહનો હિન્ડોલ રે,
સ્નેહધામ સૂનાં સૂનાં રે:
વ્હાલાની વાગે દૂર વાંસળી,
નાથ ! આવો, બોલો એક બોલ રે,
સ્નેહધામ સૂનાં સૂનાં રે.