પ્રભુજી સાથે પ્રીત ન કીધી
| પ્રભુજી સાથે પ્રીત ન કીધી પ્રીતમ |
પદ ૫૬ રાગ ગોડી.
પ્રથમ પ્રભુજી સાથે પ્રીત ન કીધી, એને મૂઆ ટાણે સંત બનાવો રે;
તુલસી મંગાવો અને તિલક કઢાવો, મુખે રામનામ લેવરાવો રે... ટેક
દવ લાગ્યા રે પછી કૂપ ખોદાવો, ઈ કેઈ પેરે અગ્નિ ઓલાશે રે;
ધન હતું તે ચોર જ લઈ ગયા, પછી દીવો કરે શું થાશે રે....
પ્રથમ પ્રભુજી સાથે ૧.
માત પિતા સુત ભાઈ ને ભગિની, ઈ સબ ઠગનકી ટોળી રે;
પ્રીત લગાડી તારું સર્વ લૂંટી લેશે, પછી રહેશે આંખ્યો ચોળી રે...
પ્રથમ પ્રભુજી સાથે ૨.
બાલપણું રમતાં ખોયું, જુવાનીમામ્ વાહાલી જુવતી રે;
બુઢ્ઢાપણે છોકરાં વાહાલાં, પછી મુવે તે માગી મુક્તિ રે...
પ્રથમ પ્રભુજી સાથે ૩.
ખાધું નહીં એણે ખરચ્યું નહીં, અને દાન માન નવ દીધુંરે;
હરિગુરુ સંતની સેવા ન કીધી, રામ નામ ન લીધુંરે...
પ્રથમ પ્રભુજી સાથે ૪.
તળાવ ફાટ્યા પછી પાળ બંધાવો, ઈ કઈ પેરે નીર ઠેરાશે રે;
કહે પ્રીતમ પ્રીતે હરિ ભજન વિના, અવસર એળે જાશે રે...
પ્રથમ પ્રભુજી સાથે ૫.
અન્ય સંસ્કરણ
ફેરફાર કરોપ્રથમ પ્રભુજી સાથે પ્રીત ન કીધી,
એને મૂઆ ટાણે સંત બનાવો રે;
તુલસી મંગાવો અને તિલક કરાવો,
મુખે રામનામ લેવરાવો રે... ટેક
દવ લાગ્યા રે પછી કૂપ ખોદાવો,
ઈ કઈ પેરે અગ્નિ ઓલાશે રે;
ધન હતું તે ચોર જ લઈ ગયા,
પછી દીવો કરે શું થાશે રે.... ૧
માત પિતા સુત ભાઈ ને ભગિની,
ઈ સબ ઠગનકી ટોળી રે;
પ્રીત લગાડી તારું સર્વ લૂંટી લેશે,
પછી રહેશે આંખ્યો ચોળી રે... ૨
તળાવ ફાટ્યા પછી પાળ બંધાવો,
ઈ કઈ પેરે નીર ઠેરાશે રે;
કહે પ્રીતમ પ્રીતે હરિ ભજન વિના,
અવસર એળે જાશે રે... ૩