રાષ્ટ્રિકા/ઇલ્મમક્કાનો હાજી
| ← મટુભાઈ હ. કાંટાવાળા | રાષ્ટ્રિકા ઇલ્મમક્કાનો હાજી અરદેશર ખબરદાર |
કાન્તનું સ્વર્ગપ્રયાણ → |
ઇલ્મમક્કાનો હાજી [૧]
• (ગઝલ) •
ખૂબ કરી જો ઇલ્મની સોદાગરી હાજી ગયો :
બેકદર ગુજરાતની કરી ચાકરી હાજી ગયો !
ખૂબ કરી. ૧
જ્યાં ભર્યાં'તાં આસમાને ઘોર કાળાં વાદળાં,
રંગ ત્યાં બેમૂલ કૈં કૈં ચીતરી હાજી ગયો !
ખૂબ કરી. ૨
જ્યાં જમીને ગૂંચવાતાં ધૂળઢગ ને ઝાંખરાં,
બાદશાહી બાગ ફૂલનો ત્યાં કરી હાજી ગયો !
ખૂબ કરી. ૩
ગુર્જરીનું ઇલ્મમક્કા પાક કીધું હજ કરી,
એક હજરતની ફકીરી દિલ ધરી હાજી ગયો !
ખૂબ કરી. ૪
ઓ મહોબ્બત ! નાઉમેદી ! ઓ જુવાની ગુલભરી !
તમ ફકીરીની અમીરી આ હરી હાજી ગયો !
ખૂબ કરી. ૫
એ અમીરીના સખુન પર ત્યાં ફિરસ્તા છે ફિદા :
અહીં ન જાણ્યું મોતી શાં શાં વીખરી હાજી ગયો !
ખૂબ કરી. ૬
રો હવે ગુજરાત ! રો, રો ! ના પિછાન્યો જીવતાં :
આંસુના દરિયાવ એવા કૈં તરી હાજી ગયો !
ખૂબ કરી. ૭
ના અદ્દલ ઈનામ જગનું ; એક કુરબાની દિલે :
કૈં અમીરી, કૈં ફકીરી, સંઘરી હાજી ગયો !
ખૂબ કરી. ૮
- ↑ વિખ્યાત "વીસમી સદી" માસિકના તંત્રી અને માલેક સ્વ. અલારખિયા શિવજી.