રાસચંદ્રિકા/દેવીનાં નવચેતન
| ← ગુણીયલ હો ગુજરાત! | રાસચંદ્રિકા દેવીનાં નવચેતન અરદેશર ખબરદાર |
મહાગુજરાતની બહેનોને → |
દેવીનાં નવચેતન
♦ કામણ દીસે છે અલબેલા તારી આંખમાં રે. ♦
દેવી ! દીસે શાં નવચેતન તારી આંખમાં રે !
તારી આંખમાં રે,
પાછું ઝાંખ મા રે !
દેવી ! દીસે.
મોહનની નવબંસી બોલે,
જુગજુગનાં પડળો કંઈ ખોલે;
અંતર ઝોલે ચઢતાં નવ અભિલાખમાં રે:
પાછું ઝાંખ મા રે ! ૧
ભ્રુગુટીનાં તપચાપ ચઢાવે,
નયન નયન શર શૂર ઉડાવે;
જ્યોતિ અનેરી લાવે જખની સાખમાં રે:
પાછું ઝાંખ મા રે ! ૨
ઉરસંયમના અંજન કીધાં,
સત્ય સનાતન વ્રત મન લીધાં;
મૃત્યુ તણાં અમી પીધાં લોટી ખાખમાં રે !
પાછું ઝાંખ મા રે ! ૩
સ્વાત્મબળે રચ દુનિયા ન્યારી,
નવચેતનની ઑર ખુમારી !
ઉરના લાખ ઉમળકા વારી રાખ મા રે !
પાછું ઝાંખ મા રે ! ૪
પ્રગટ અભય સદ્ધર્મ પ્રસારવા,
એકકુટુંબી વસુધા કરવા,
ગરવા ગુણ ઉદ્ધરવા રાજા રાંકમાં રે !
પાછું ઝાંખ મા રે ! ૫
દેવી ! એ નવગૌરવ કાજે
હસતાં વહાણાં દ્વાર વિરાજે :
ધસિયે આજે ત્રીસ ક્રોડ તુજ પાંખમાં રે !
પાછું ઝાંખ મા રે ! ૬
નવજુગમાં નવમોહન બોલે,
રુદ્ર ત્રીજું લોચન કંઈ ખોલે:
ઓ દેવી ! ડોલે બ્રહ્માંડ જરાકમાં રે !
પાછું ઝાંખ મા રે !
દેવી ! ઉભરે શાં નવચેતન તારી આંખમાં રે ! ૭