ન્હાના ન્હાના રાસ/સંભારણાં
| ← વસન્તમાં, સખિ! | ન્હાના ન્હાના રાસ - ભાગ ૧ સંભારણાં ન્હાનાલાલ કવિ |
હતો → |
સંભારણાં
રૂપલા રાતલડીમાં ઉઘડે ઉરનાં બારણાં, હો બ્હેન !
ઝુલે રસપારણાં, હો બ્હેન !
ત્ય્હારે ઝબકે ઝીણાં અતિથિનાં સંભારણાં, હો બ્હેન !
લઉં હું વારણાં, હો બ્હેન !
શરદ પુનમનો ચાંદલો ઘડી ચમકીને જાય :
વરસ દિવસ વીત્યે, સખિ ! દોહલ દર્શન થાય.
અન્ધારી રજનીમાં ઉઘડે ઉરનાં બારણાં, હો બ્હેન !
ઝુલે રસપારણાં, હો બ્હેન !
ત્ય્હારે ઝબકે અમૃતઅતિથિનાં સંભારણાં, હો બ્હેન !
લઉં હું વારણાં, હો બ્હેન !
મેઘ ઝરે, રસ નીતરે, આંબો ઝોલાં ખાય :
ખીલે ન મ્હોર, ન મંજરી : સખિ ! નથી આ ઋતુરાય.
સૂની રજનીઓમાં ઉઘડે ઉરનાં બારણાં, હો બ્હેન !
ઝુલે રસપારણાં, હો બ્હેન !
ત્ય્હારે ઝબકે રાજનઅતિથિનાં સંભારણાં, હો બ્હેન !
લઉં હું વારણાં, હો બ્હેન !
દૂર દૂરની કુંજમાં મોર કરે ટહુકાર :
સખિ ! ટહુકામાં જીવવું, મોંઘા મોરદિદાર.
લાંબી રાતલડીમાં ઉઘડે ઉરનાં બારણાં, હો બ્હેન !
ઝુલે રસપારણાં, હો બ્હેન !
ત્ય્હારે ઝબકે ઉરના અતિથિનાં સંભારણાં, હો બ્હેન !
લઉં હું વારણાં, હો બ્હેન !