ન્હાના ન્હાના રાસ - ભાગ ૩/વસન્તની વાંસળી
| ← વસન્તના સોણલા | ન્હાના ન્હાના રાસ - ભાગ ૩ વસન્તની વાંસળી ન્હાનાલાલ કવિ |
વસન્તમા → |
૧૧; વસન્તની વાંસળી
હાં રે જુગ જાગે, રે જુગ જાગે !
હાં રે નવવસન્ત કેરી વાંસલડી વાગે,
રે ! જુગ જાગે.
હાં રે ધર્યા ધરતીએ વસન્તરંગ રૂડલા,
હાં રે નયનનયને ઉગ્યાં વસન્તફૂલડાં,
રે ! જુગ જાગે.
હાં રે આંબે આંબે એ મંજરીઓ મ્હોરી;
હાં રે દેવસુન્દરીની ફોરમો રહી ફોરી,
રે ! જુગ જાગે.
હાં રે તેજઝારીઓએ દેવદેવી આવે;
હાં રે સંજીવનની વસન્તિકા વધાવે,
રે ! જુગ જાગે.
હાં રે સૌ સોહાગિયાં વસન્ત સમાં ખીલજો!
હાં રે જગતલોક ! આ વસન્તજુગ ઝીલજો!
રે ! જુગ જાગે.
હાં ર જુગ જાગે, રે ! જુગ જાગે.
♣