યુગવંદના/પરાજિતનું ગાન
< યુગવંદના
| ← તોય મા તે મા ! | યુગવંદના પરાજિતનું ગાન ઝવેરચંદ મેઘાણી ૧૯૩૧ |
સ્વતંત્રતાની મીઠાશ → |
પરાજિતનું ગાન :
ગા, મન, પરાજિતનું ગાન –
એકલ પરાજિતનું ગાન
પરાજિત સેનાપતિનાં
પંથ ને મેદાન સૂનાં !
શમ્યાં છે સન્માન જૂનાં !
વિજન પુરની ગલીગલીએ
તોયે ગાજે ગાન –
ઓ મન, પરાજિતનું ગાન !
પરાજિત પાછો વળે સજવાં નવાં આયુધ;
જનેતાને સ્તનેથી પીવા અભયનાં દૂધ :
કોણ સૂતા, કોણ જાગે?
કોણ જખમી દવા માગે ?
– પૂછતો પ્રેમાળ રાગે ભમે છે મહેમાન :
ગા, મન, પરાજિતનું ગાન !
પરાજિતનો ચાંદલો કંકુ તણો :
પરાજિતનાં છત્ર-ચામર-વીંજણો :
પરાજિતના લખોમુખ યોદ્ધાગણો :
સહુ વિરમ્યાઃ એક નવ વિરમો
કવિજન-ગાન !
ગા, મન, પરાજિતનું ગાન –
એકલ પરાજિતનું ગાન.