શ્યામ રંગ સમીપે ન જાવું
| શોભા સલૂણા શ્યામની દયારામ |
ગરબી 3 જી થી
શ્યામ રંગ સમીપે ન જાવું, મારે આજથકી શ્યામરંગ. —ટેક.
જેમાં કાળાસ તે સહુ એક સરખું, સરવમાં કપટ હશે આહ્વું ? મારે.
કસ્તુરીની બિંદી તો કરું નહીં, કાજળ ન આંખમાં અંજાવું. મારે.
કોકીલાનો શબ્દ સુણું નહીં, કાગવાણી શકુનમાં ન લાવું. મારે.
નીલાંબર કાળી કંચુકી ન પહેરું, જમનાનાં નીરમાં ન ન્હાવું. મારે.
મરકત મણી ને મેઘ દૃષ્ટે ન જોવાં, જાંબુ વંત્યાક ન ખાવું. મારે.
દયાના પ્રીતમ સાથે મુખે નીમ લીધો, મન કહે પલક ના નિભાવું. મારે.
અન્ય સંસ્કરણ
ફેરફાર કરો
શ્યામ રંગ સમીપે ન જાવું,
મ્હારે આજ થકી શ્યામ રંગ સમીપે ન જાવું.
જેમાં કાળાશ તે સહુ એક સરખું,
સર્વમાં કપટ હશે આવું ? મ્હારે આજ૦
કસ્તુરીની બિંદી તો કરૂં નહીં,
કાજળ ન આંખમાં અંજાવું. મ્હારે આજ૦
કોકિલાનો શબ્દ સૂણું નહીં,
કાગવાણી શકુનમાં ન લાવું. મ્હારે આજ૦
નીલાંબર કાળી કંચુકી ન પહેરૂં,
જમુનાનાં નીરમાં ન ન્હાવું. મ્હારે આજ૦
મરકતમણિ ને મેઘ દૃષ્ટે ન જોવાં,
જાંબુ વંત્યાક ન ખાવું. મ્હારે આજ૦
'દયા'ના પ્રીતમ સાથે મુખે નીમ લીધો,
મન કહે પલક ના નિભાવું. મ્હારે આજ૦